మ‌న‌కు దీపావ‌ళి...వారికి డ్యూటీ
వెలుగుల పండుగ దీపావ‌ళిని ఇష్ట‌ప‌డ‌నివారు ఉండ‌రు. బాణ‌సంచా కాల్చ‌డం ప‌ట్ల అంత‌గా ఆస‌క్తి లేనివారు కూడా దీపావ‌ళి వెలుగుల‌ను చూసేందుకు ఇష్ట‌ప‌డ‌తారు. అయితే ఈ వెలుగులు ప్ర‌తిఏటా ప్ర‌మాదాల రూపంలో కొంద‌రికి చీక‌ట్ల‌ను సైతం తెస్తుంటాయి. నిజానికి ప్ర‌మాదాలు లేని దీపావ‌ళే ప్ర‌మోదాల దీపావ‌ళి. పండుగ‌నాడు ప్ర‌మాదాలు అనివార్యం క‌నుక ఢిల్లీలోని అయిదు పెద్ద ఆసుప‌త్రులు ఆరోజు ప్ర‌మాదాల బారిన ప‌డిన‌వారికి చికిత్స‌చేసేందుకు సిద్ధ‌మ‌వుతున్నాయి. సఫ్దర్జంగ్, రామ్‌ మ‌నోహ‌ర్ లోహియా, గురుతేజ్ బహదూర్, దీన్‌ద‌యాళ్ ఉపాధ్యాయ్‌, లోక్ […]
వెలుగుల పండుగ దీపావ‌ళిని ఇష్ట‌ప‌డ‌నివారు ఉండ‌రు. బాణ‌సంచా కాల్చ‌డం ప‌ట్ల అంత‌గా ఆస‌క్తి లేనివారు కూడా దీపావ‌ళి వెలుగుల‌ను చూసేందుకు ఇష్ట‌ప‌డ‌తారు. అయితే ఈ వెలుగులు ప్ర‌తిఏటా ప్ర‌మాదాల రూపంలో కొంద‌రికి చీక‌ట్ల‌ను సైతం తెస్తుంటాయి. నిజానికి ప్ర‌మాదాలు లేని దీపావ‌ళే ప్ర‌మోదాల దీపావ‌ళి. పండుగ‌నాడు ప్ర‌మాదాలు అనివార్యం క‌నుక ఢిల్లీలోని అయిదు పెద్ద ఆసుప‌త్రులు ఆరోజు ప్ర‌మాదాల బారిన ప‌డిన‌వారికి చికిత్స‌చేసేందుకు సిద్ధ‌మ‌వుతున్నాయి. సఫ్దర్జంగ్, రామ్‌ మ‌నోహ‌ర్ లోహియా, గురుతేజ్ బహదూర్, దీన్‌ద‌యాళ్ ఉపాధ్యాయ్‌, లోక్ నాయ‌క్ ఈ అయిదు ఆసుప‌త్రుల తాలూకూ వైద్యులు ఈ విష‌యాన్ని ప్ర‌క‌టిస్తూ, దీపావ‌ళినాడు తీసుకోవాల్సిన జాగ్ర‌త్త‌ల గురించి వివ‌రించారు.
సఫ్దర్జంగ్ ఆసుప‌త్రిలో బ‌ర్న్స్ అండ్ ప్లాస్టిక్ స‌ర్జ‌రీ డిపార్ట్‌మెంట్ హెడ్ డాక్ట‌ర్ క‌రూన్ అగ‌ర్వాల్ మాట్లాడుతూ, బాణ‌సంచా కాలుస్తున్న‌పుడు చేతులు, ముఖం ప్ర‌మాదానికి గురికావ‌డం ఎక్కువ‌గా జ‌రుగుతుంద‌ని, కాబ‌ట్టి ప్ర‌జ‌లు జాగ్ర‌త్త‌లు తీసుకోవాల‌ని సూచించారు. పిల్ల‌లు, యువ‌తీ యువ‌కులు చేతుల్లోనే ట‌పాసులు పేల్చ‌డం, వెలిగి ఆరిపోయిన‌వాటిని తిరిగి వెలిగించ‌డం చేస్తుంటార‌ని, అలా చేయ‌కూడ‌ద‌ని, మందుసామ‌గ్రి కాలుస్తున్న‌పుడు ప‌క్క‌న నీళ్ల బ‌క్కెట్ పెట్టుకోవాల‌ని ఆయ‌న సూచించారు. గ‌త ఏడాది త‌మ ఆసుప‌త్రి బ‌ర్న్‌వార్డ్‌లో 300 మంది కాలిన‌గాయాల బాధితుల‌కు చికిత్స చేశామ‌ని, అందులో స‌గం మంది పిల్ల‌లే ఉన్నార‌ని ఆయ‌న చెప్పారు.
రామ్‌మ‌నోహ‌ర్ లోహియా ఆసుప‌త్రిలో బాధితుల‌కు ఆల‌స్యం చేయ‌కుండా ట్రీట్‌మెంట్ మెద‌లుపెట్టేందుకు చ‌ర్య‌లు తీసుకుంటున్నారు. పేషంట్లు సాధారణంగా సాయంత్రం అయిదునుండి తెల్ల‌వారు జామున నాలుగువ‌ర‌కు వ‌స్తూనే ఉంటార‌ని ఈ ఆసుప‌త్రిలో బ‌ర్న్స్ అండ్ ప్లాస్టిక్ స‌ర్జ‌రీ డిపార్ట్‌మెంట్ హెడ్ డాక్ట‌ర్ వి.కె.తివారీ అన్నారు. డ్రెస్సింగ్ మెటీరియ‌ల్‌, అద‌న‌పుడు బెడ్స్ ఇంకా కాలిన గాయాల చికిత్స‌కు కావాల్సిన సామ‌గ్రి, సిబ్బందిని అందుబాటులో ఉంచే ప్ర‌య‌త్నంలో ఉన్నారు లోక్‌నాయ‌క్ ఆసుప‌త్రి వైద్యులు. గురుతేజ్ బహదూర్ ఆసుప‌త్రిలో ఇత‌ర స‌దుపాయాల‌తో పాటు కంటి వైద్యుల‌ను సైతం సిద్ధంగా ఉంచుతున్నారు.
చిన్న క్రాక‌ర్స్ అయితే క‌నుబొమ‌లు, క‌నురెప్ప‌ల‌కు చిన్న‌పాటి గాయాలు అవుతాయ‌ని, అదే పెద్ద రాకెట్స్ లాంటివ‌యితే ప్ర‌మాదం జ‌రిగిన‌పుడు కంటి రెటీనాకు, న‌రాల‌కు సైతం తీవ్ర‌హాని చేస్తాయ‌ని దీనివ‌ల‌న శాశ్వ‌తంగా కంటిచూపు పోయే ప్ర‌మాదం ఉంద‌ని రామ్‌మ‌నోహ‌ర్ లోహియా ఆసుప‌త్రిలో కంటిచికిత్సా విభాగపు హెడ్ డాక్ట‌ర్ ప్ర‌వీణ్ మాలిక్ అన్నారు. త‌ప్ప‌నిస‌రిగా కంటికి హాని క‌ల‌గ‌కుండా జాగ్ర‌త్త‌లు పాటించాల‌ని ఆయ‌న సూచించారు. వినోదంలో విషాదం జ‌రిగితే ఆదుకునేందుకు పండుగ‌నాడు సిద్ధంగా ఉంటున్న వైద్యుల‌ను అభినందించాల్సిందే…అలాగే వారికి ప‌ని క‌ల్పించ‌కుండానే పండుగని చేసుకోవ‌డం మ‌నంద‌రి బాధ్య‌త గా గుర్తించాలి.
