రేవంత్ కాంగ్రెస్‌లోకి వెళ్ల‌డం లేదా?

టీడీపీ వ‌ర్కింగ్ ప్రెసిడెంట్‌, ఓటుకు నోటు కేసులో ప్ర‌ధాన నిందితుడు రేవంత్ రెడ్డిపై ఓ ప్ర‌చారం న‌డుస్తోంది. ఆయ‌న కాంగ్రెస్‌లోకి వెళ‌తార‌న్న‌ది దాని సారాంశం. అలాంటిదేమీ లేద‌ని రేవంత్‌ నెత్తీనోరు బాదుకుంటున్నా.. ఈ ప్ర‌చారం మాత్రం ఆగ‌డం లేదు. ఇటు మీడియాలో.. అటు అసెంబ్లీ లాబీల్లో ఏ ఇద్దరు క‌లిసినా ఈ విష‌య‌మే మాట్లాడుతున్నారు. తాజాగా ఆర్డీఎస్ వ‌ద్ద కాంగ్రెస్ ఆధ్వ‌ర్యంలో జ‌రిగిన ధ‌ర్నాకు రేవంత్ హాజ‌ర‌య్యారు. అక్క‌డ కూడా ఈ ప్ర‌చారంపై ఆయ‌న వివ‌ర‌ణ ఇచ్చుకోవాల్సి వ‌చ్చిందంటే ఆ ప్ర‌చార తీవ్ర‌త అర్థం చేసుకోవ‌చ్చు. ఈ వార్త‌ను ప‌దే ప‌దే రాస్తోందంటూ ఓ ప‌త్రిక‌పై ఆయ‌న మండిప‌డ్డారు కూడా. అయితే, తాను కాంగ్రెస్‌లోకి వెళ్ల‌డం లేదంటూ కాంగ్రెస్ నిర్వ‌హించిన ధ‌ర్నాలోనే రేవంత్ స్ప‌ష్టం చేశారు. 
ఇంత‌కీ ఆ ప్ర‌చారం ఎప్పుడు మొద‌లైంది…
టీ-టీడీపీ టీఆర్ ఎస్‌లో విలీనం కాక‌ముందే ఈ ప్ర‌చారం మొద‌లైంది. దీంతో తెలంగాణ‌లో తెలుగుదేశం పార్టీ ప‌నై పోయింద‌ని, అందుకే ఆయ‌న రాజ‌కీయ భ‌విష్య‌త్తు గంద‌ర‌గోళంలో ప‌డింద‌ని, గ‌త్యంత‌ర లేక కాంగ్రెస్‌లో చేరుతున్నార‌న్న‌ది ఈ ప్ర‌చారం సారాంశం. దీనిపై ఇప్ప‌టికే చాలాసార్లు రేవంత్ వివ‌ర‌ణ ఇచ్చుకున్నారు. అయితే, తాజాగా ఆయ‌న ఆర్డీఎస్ వ‌ద్ద‌ కాంగ్రెస్ చేప‌ట్టిన‌ ధ‌ర్నాకు హాజ‌ర‌వ్వ‌డం, ఆ పార్టీకి మ‌ద్ద‌తుగా మాట్లాడటంతో ఈ ప్ర‌చారం మ‌రింత ఊపందుకుంది. ఆయ‌న త్వ‌ర‌లోనే పార్టీ మాతార‌ని, అందుకే ముంద‌స్తుగా ఆపార్టీ నేత‌ల‌తో స్నేహం పెంచుకుంటున్నార‌ని రేవంత్ ప్ర‌త్య‌ర్థులు విశ్లేషిస్తున్నారు. ధ‌ర్నాలో వేదిక‌పై రేవంత్ స‌మీప‌ బంధువు (కాంగ్రెస్ కీల‌క నేత‌) ఒక‌రు ఉండ‌టం వారి ప్ర‌చారానికి మ‌రింత ఊత‌మిస్తోంది.