ల‌క్ష్యం సాధించే క్రీడాకారుల‌కోసం...ల‌క్షల్లో కండోములు!

ఆగ‌స్టులో బ్రెజిల్‌లో ప్రారంభం కానున్న రియో ఒలింపిక్స్‌కి 4 ల‌క్ష‌ల 50వేల కండోమ్స్‌ని పంపిణీ చేస్తున్న‌ట్టుగా అంత‌ర్జాతీయ ఒలింపిక్ క‌మిటీ తెలిపింది. ఈ సంఖ్య నాలుగేళ్ల క్రితం లండన్‌లో జ‌రిగిన ఒలింపిక్స్‌కి పంపిణీ చేసిన కండోమ్స్ సంఖ్య కంటే మూడు రెట్లు ఎక్కువ‌. ఒక ల‌క్ష ఆడ‌వారి కండోముల‌ను, 3 ల‌క్ష‌ల 50 వేలు మ‌గ‌వారికి సంబంధించిన వాటిని ఆట‌లు జ‌రుగుతున్న రియో గ్రామంలో స‌ప్ల‌యి చేస్తున్న‌ట్టుగా క‌మిటీ ప్ర‌క‌టించింది. రియో ఒలింపిక్స్‌లో పాల్గొంటున్న 10,500మంది క్రీడాకారులు, సిబ్బంది సుర‌క్షిత‌మైన సెక్స్‌ని పొంద‌డానికి వీలుగా ఈ ఏర్పాటు చేసిన‌ట్టుగా ఐఓసి తెలిపింది. అయితే ఇటీవ‌ల బ్రెజిల్‌లో విస్తృతంగా వ్యాపించిన జికా వైర‌స్‌కి భ‌య‌ప‌డి ఈ నిర్ణయం తీసుకున్నార‌నే అనుమానాలు వ్య‌క్త‌మ‌వుతున్నాయి. దీనిపై ఐఓసి ఎలాంటి స్ప‌ష్ట‌త ఇవ్వ‌లేదు. ఆగస్టు 5న క్రీడ‌లు మొద‌లు కానుండ‌గా జులై 24 నుండి వీటిని ఉచితంగా అందించే ఏర్పాట్లు చేస్తున్నారు. 2000సంవ‌త్స‌రం నుండి ఒలింపిక్స్‌కి ఒక ల‌క్ష నుండి ల‌క్షా 50 వేల వ‌ర‌కు మాత్ర‌మే కండోముల‌ను స‌ప్ల‌యి చేస్తున్నార‌ని, అయితే ఈ ఏడాది పెరుగుద‌లకు జికా వైర‌స్ మాత్రం కార‌ణం కాద‌ని బ్రెజిల్ వార్తా ప‌త్రిక‌లు వెల్ల‌డించాయి.