ర‌క్షణ ద‌ళాల్లో ...మ‌హిళ‌ల పాలిట భ‌క్ష‌కులు!

దేశ భ‌ద్ర‌త బాధ్య‌త‌లు మోస్తున్న ఆర్మీ, నేవీ, ఎయిర్‌ఫోర్స్ ద‌ళాల్లో ఉన్న‌త పోస్టుల్లో ఉన్న‌వారు చాలామంది… మ‌హిళ‌ల‌పై లైంగిక దాడుల ఆరోప‌ణ‌లను ఎదుర్కొంటున్నారు. ఇది వారికి నిత్య‌కృత్యంగా మారిన‌ట్టుగా ఉంది. ఒక నేవీ యువ వైద్యురాలు, త‌న‌పై త‌న సీనియ‌ర్ డాక్ట‌ర్ రెండుసార్లు అత్యాచారానికి పాల్ప‌డ్డాడంటూ పై అధికారుల‌కు ఫిర్యాదు చేసింది. ఆమె ఆరోప‌ణ‌లు చేసిన‌ వ్య‌క్తి నావికాద‌ళంలో అత్యున్న‌త స్థానంలో ఉన్నాడు. ఆయ‌న స‌ర్జ‌న్ క‌మాండర్‌..అంటే ఆర్మీలో లెఫ్టినెంట్ క‌ల్న‌ల్ స్థాయి పోస్ట‌ది. అంతేకాదు, ఆయ‌న ఈ సంవ‌త్స‌రం రిప‌బ్లిక్ డే రోజున విశిష్ట్ సేవా మెడ‌ల్‌ని సైతం అందుకున్న వ్య‌క్తి.

మ‌హిళా వైద్యురాలి ఆరోప‌ణ‌ల‌కు స్పందించిన అధికారులు కెప్టెన్ ర్యాంకు అధికారితో ఒక విచార‌ణ బోర్డుని నియ‌మించ‌గా, ఆ బోర్డు త‌న నివేదిక‌ను నావ‌ల్ హెడ్ క్వార్ట‌ర్స్‌కి అందించింది. త‌దుప‌రి చ‌ర్య‌ల‌కోసం అధికారులు ఆ నివేదిక‌ను ప‌రిశీలిస్తున్నారు. ఆ ఉన్న‌త అధికారి నేరం చేసిన‌ట్టుగా రుజువైతే త‌ప్ప‌కుండా త‌గిన చ‌ర్య‌లు తీసుకోవ‌టం జ‌రుగుతుంద‌ని ఒక నేవీ అధికారి తెలిపారు. మ‌హిళా డాక్ట‌ర్ చెబుతున్న వివ‌రాల ప్ర‌కారం ఈ నెల ఆరో తేదీన ఆ సీనియ‌ర్ వైద్యుడు, ఆమె క‌లిసి ఒక వైస్ అడ్మిర‌ల్ ఇంటికి, బెడ్‌మీదున్న ఆయ‌న తల్లికి చికిత్స‌ని అందించ‌డానికి వెళ్లారు. ఆ స‌మ‌యంలో వైస్ అడ్మిర‌ల్ ఇంట్లో లేరు. ఆ ఇంట్లో తాను బాత్‌రూంకి వెళ్ల‌గా సీనియ‌ర్ డాక‌ర్ట్ త‌న‌పై అత్యాచారానికి పాల్ప‌డిన‌ట్టుగా మ‌హిళా డాక్ట‌ర్ పేర్కొంది. ఆమె వెంట‌నే త‌న సీనియ‌ర్ అధికారుల‌కు, ఐఎన్ఎస్ ఇండియా క‌మాండింగ్ అధికారికి, ప‌ర్సన‌ల్ స‌ర్వీసెస్ కంట్రోల‌ర్‌కి ఫిర్యాదు చేసింది. అయితే ఇంత చేసినా త‌రువాత రోజే మ‌రోసారి సీనియ‌ర్ డాక్ట‌ర్ ఆమెపై అత్యాచారానికి పాల్ప‌డ్డాడు. ఇప్పుడు ఆయ‌న‌పై ఆరోప‌ణ‌లు రుజువైతే క‌ఠిన చ‌ర్య‌లు తీసుకునే అవ‌కాశం ఉంది. ఈ మ‌ధ్య కాలంలో సైనిక ద‌ళాల్లో ఇలాంటి ఆరోప‌ణ‌లు పెరుగుతున్నాయి. త‌న సీనియ‌ర్ అధికారి భార్య‌తో అక్ర‌మ సంబంధం క‌లిగి ఉన్నందుకు… జోధ్‌పూర్‌లో ఇండియ‌న్ ఎయిర్‌ఫోర్సు, ఒక ఫైట‌ర్ పైల‌ట్‌ని విధుల‌నుండి తొల‌గించింది. ముంబయిలో ఇద్ద‌రు నేవీ అధికారులు వివాహేత‌ర సంబంధాలు క‌లిగి ఉన్నందుకు, అస‌భ్య‌క‌ర‌మైన మెసేజ్‌లు పంపినందుకు ఉద్యోగాలు పోగొట్టుకున్నారు.