బురిడీ బాబాకు సినిమాలు, నవలలు స్ఫూర్తినిచ్చాయా!
మోసపోయేవాళ్లున్నంతకాలం మోసం చేసే వాళ్లుంటారని బురిడీ బాబా శివానంద రుజువు చేశాడు. హైదరాబాద్లోని లైఫ్స్టైల్ భవనం యజమాని మధుసూదన్ రెడ్డి నివాసంలో 1.3 కోట్ల రూపాయలు కొల్లగొట్టి పారిపోతున్న శివను పోలీసులు వెంబడించి బెంగలూరులోని ఓ ఇంట్లో అరెస్టు చేసినట్టుగా సమాచారం. శివానంద, అలియాస్ బుడ్డప్పగారి శివ అనే ఈ మోసగాడు ఇంతకుముందు కూడా రెండు తెలుగురాష్ట్రాలు, బెంగలూరుల్లో ఆరుసార్లు భారీ మోసాలకు పాల్పడి ఆరుకోట్లు కొల్లగొట్టినట్టుగా తెలుస్తోంది. పూజలో లక్షపెడితే రెండు లక్షలు, కోటిరూపాయలు […]
మోసపోయేవాళ్లున్నంతకాలం మోసం చేసే వాళ్లుంటారని బురిడీ బాబా శివానంద రుజువు చేశాడు. హైదరాబాద్లోని లైఫ్స్టైల్ భవనం యజమాని మధుసూదన్ రెడ్డి నివాసంలో 1.3 కోట్ల రూపాయలు కొల్లగొట్టి పారిపోతున్న శివను పోలీసులు వెంబడించి బెంగలూరులోని ఓ ఇంట్లో అరెస్టు చేసినట్టుగా సమాచారం. శివానంద, అలియాస్ బుడ్డప్పగారి శివ అనే ఈ మోసగాడు ఇంతకుముందు కూడా రెండు తెలుగురాష్ట్రాలు, బెంగలూరుల్లో ఆరుసార్లు భారీ మోసాలకు పాల్పడి ఆరుకోట్లు కొల్లగొట్టినట్టుగా తెలుస్తోంది.
పూజలో లక్షపెడితే రెండు లక్షలు, కోటిరూపాయలు ఉంచితే రెండు కోట్లు అవుతాయని మధుసూదన్ రెడ్డి కూమారుడు సందేశ్ రెడ్డిని శివ ముందుగా నమ్మించాడు. సంవత్సరంన్నర కాలంగా వీరిద్దరికీ పరిచయం ఉంది. ముందుగా ఒకసారి తన కనికట్టుతో మధుసూదన్రెడ్డి ఇచ్చిన లక్షన్నరను మూడు లక్షలు చేశాడు. దాంతో మధుసూదన్ రెడ్డి కుటుంబీకులు శివతో పూజలు చేయించడానికి అంగీకరించారు. అతడిని బెంగలూరు నుండి ఇన్నోవా ట్యాక్సీలో రప్పించారు. ఓ హోటల్లో గదిని బుక్ చేశారు.
పూజలు నిర్వహిస్తున్నపుడు ఎవరూ ఉండకూడదు, ఫొటోలు, వీడియోలు తీయకూడదని చెప్పాడు. పూజల అనంతరం సందేశ్రెడ్డి తల్లిదండ్రులకు ప్రసాదం పెట్టాడు. పూజల కారణంగా ధ్యానంలో, కాస్త మత్తుగా ఉంటారని చెప్పాడు. దేవాలయాల్లో ఇంకా పూజలు చేయాల్సి ఉందంటూ సందేశ్రెడ్డిని తీసుకుని రెండు ఆలయాలకు వెళ్లి పూజలు చేయించాడు. తరువాత తాను దిగిన ఓరిస్ హోటల్కి వెళ్లి అక్కడ కూడా పూజలు చేసి సందేశ్రెడ్డికి మత్తుమందు కలిపిన ప్రసాదం ఇచ్చాడు. సందేశ్రెడ్డి స్పృహ తప్పడంతో అతని వద్ద కారుతాళం తీసుకుని కారులో ఉన్న డబ్బు బ్యాగుని తాను వచ్చిన ఇన్నోవా ట్యాక్సీలోకి మార్చుకుని పరారయ్యాడు. తరువాత ట్యాక్సీని వదిలేసి ఆటోలో తిరుగుతూ బెంగలూరు బస్ ఎక్కాడు.
పోలీసులు శివ వచ్చిన ఇన్నోవా ట్యాక్సీని సైతం మహబూబ్నగర్ జిల్లాలో పట్టుకుని డ్రైవర్ని విచారిస్తున్నారు. బెంగలూరులో శివని పోలీసులు అరెస్టు చేశారని, శుక్రవారం మీడియా ముందు ప్రవేశపెట్టే అవకాశం ఉందని తెలుస్తోంది. బెంగలూరులో స్థిరపడిన శివ స్వస్థలం చిత్తూరు జిల్లా. ఇంతకుముందు కూడా చిత్తూరు, బెంగలూరు, సైబరాబాద్లోని కెపిహెచ్బి కాలనీల్లో అతనిపై ఇలాంటివే ఆరుకేసులు నమోదు అయ్యాయి. శివ కోసం బుక్చేసిన హోటల్లో కొన్ని నవలలను పోలీసులు గుర్తించారు. అందులో మోసాలు చేయటం గురించి కథనాలు ఉన్నాయి. శివ ఇలాంటి నవలలు చదివి, సినిమాలు చూసి వాటిని తన మోసాలకు ఉపయోగించుకుంటున్నాడని పోలీసులు భావిస్తున్నారు. అతను మధుసూదన్రెడ్డి ఇంట్లో పూజలు చేసినపుడు కూడా అతని వద్ద హ్యా రీ పాటర్ నవల ఉంది. డబ్బుని రెట్టింపు చేసే శక్తి ఉన్నవాడు, మన ఇళ్లకు వచ్చి పూజలు ఎందుకు చేస్తాడు…అనే చిన్నపాటి విచక్షణతో ఆలోచించినా ఇలాంటి బురిడిబాబాలకు బలికాకుండా తప్పించుకోవచ్చు మరి.