అప్పుడే పుట్టి ఉంటే 18ఏళ్ల అమ్మాయి అయ్యేది...ఇప్పుడు పుట్టింది!

చైనాలో 45 ఏళ్ల హాంగ్ క్వింగ్ అనే మ‌హిళ ఆరోగ్య‌వంత‌మైన పాప‌కి జ‌న్మ‌నిచ్చింది. ఇందులో ఆశ్చ‌ర్యం లేదు కానీ ఆమె ద్వారా జ‌న్మించిన శిశువు…18 ఏళ్ల క్రిత‌మే పిండంగా ఏర్ప‌డి శీత‌లీక‌ర‌ణ విధానం ద్వారా భ‌ద్ర‌ప‌ర‌చ‌బ‌డి ఉంది. దీంతో ఇంత ఎక్కువ కాలం శీత‌లీక‌ర‌ణ పిండంగా ఉండి జ‌న్మించిన పాప‌గా ఈ శిశువు రికార్డు సృష్టించింది. స్త్రీ అండం, పురుషుని వీర్య‌క‌ణంతో ఫ‌ల‌దీక‌ర‌ణం చెందిన‌ అనంత‌రం… ఏర్ప‌డిన పిండాల‌ను చైనాలో దాదాపు ఐదేళ్ల వ‌ర‌కు భ‌ద్ర‌ప‌రుస్తున్నారు. త‌ల్లిదండ్రులు వ‌చ్చి ఇక త‌మ‌కు అక్క‌ర్లేద‌ని చెప్పేవ‌ర‌కు వాటిని అలాగే ఉంచుతున్నారు.

ఫాలోపియ‌న్ ట్యూబ్‌లు మూసుకుపోవ‌టంతో… తాను బిడ్డ‌ని క‌నే ప‌రిస్థితిలేద‌ని తెలిసిన త‌రువాత హాంగ్‌, అప్ప‌ట్లో ఐవిఎఫ్ ద్వారా బిడ్డ‌ను క‌నే ప్ర‌య‌త్నాల‌ను మూడుసార్లు చేసింది. ఫ‌లించ‌క‌పోవ‌టంతో 1998లో త‌న ప్ర‌య‌త్నాల‌ను ఆపేసింది. భ‌విష్య‌త్తులో క‌నే అవ‌కాశం ఉంటుంద‌నే ఆశ‌తో త‌మ పిండాన్ని భ‌ద్ర‌ప‌ర‌చుకుంది. ఇలాంటి పిండాల‌ను ద్ర‌వ‌రూపంలో ఉన్న నైట్రోజ‌న్‌లో మైన‌స్ 196 డిగ్రీల సెల్సియ‌స్ వ‌ద్ద భ‌ద్ర‌ప‌రుస్తారని, సాధార‌ణంగా వీటిని ఐదేళ్ల లోపు వాడుతుంటార‌ని షాంఘై ఆరోగ్య‌శాఖ వెల్ల‌డించింది.

త‌న స్నేహితురాలు ఇదేప‌ద్ధ‌తిలో బిడ్డ‌ని క‌న‌డంతో హాంగ్ 2015లో తానూ మ‌రొక‌సారి ప్ర‌య‌త్నించాల‌నుకుంది. ఈసారి వైద్యులు స‌ర్జ‌రీ చేసి ఆమెలో ప‌లుచ‌గా ఉన్న ఎండోమెట్రియం పొర‌ని స‌రిచేశారు. అనంత‌రం 18ఏళ్ల క్రితం శీత‌లీకరించిన ఆమె పిండాన్ని ఆమెలో ప్ర‌వేశ‌పెట్టారు. ఈసారి ప్ర‌య‌త్నం ఫ‌లించి హాంగ్ 3,300గ్రాముల బ‌రువున్న ఆరోగ్య‌వంత‌మైన ఆడ‌పిల్ల‌ని ప్ర‌స‌వించింది. మొత్తానికి 18ఏళ్ల క్రితం ఆ ఇంటికి రావాల్సిన బిడ్డ ఇప్పుడు వ‌చ్చింది. చైనాలోని ఒక ప్ర‌ముఖ‌ న్యూస్ ఏజ‌న్సీ ఈ వివ‌రాలను వెల్ల‌డించింది. చైనాలో ప్ర‌భుత్వం రెండో బిడ్డ‌కు అనుమ‌తిని ఇవ్వ‌టంతో ఇప్పుడు మ‌ధ్య వ‌య‌సు మ‌హిళ‌లు మ‌రో బిడ్డని ఈ విధానంలో క‌నేందుకు ముందుకు వ‌స్తున్నారు.