జంక్‌ఫుడ్ తిన‌కండి అంటే విన‌లేదు...ప‌న్ను వేశాక దారికొచ్చారు!

శ‌రీరానికి ఏమాత్రం పోష‌క విలువ‌ల‌ను అందించ‌ని జంక్‌ఫుడ్‌ని తీసుకోవ‌ద్ద‌ని ఆరోగ్య నిపుణులు ప‌దేప‌దే చెబుతుంటారు. కానీ వాటి అమ్మ‌కాలు, వినియోగం ఏ మాత్రం త‌గ్గ‌వు. ఆ రుచికి అల‌వాటు ప‌డిన‌వారు వాటిని తిన‌కుండా ఉండ‌లేరు. అయితే ఈ స‌మ‌స్య‌ని ప‌రిష్క‌రించ‌డానికి మెక్సికో ప్ర‌భుత్వం ఒక మంచి ఉపాయం ఆలోచించింది. ఎన‌ర్జీ సాంద్ర‌త 100 గ్రాముల‌కు 275 కిలోకేల‌రీల కంటే ఎక్కువ‌గా ఉన్న‌ జంక్‌ఫుడ్‌మీద ప్ర‌భుత్వం 8శాతం ప‌న్ను వ‌డ్డించ‌డంతో వాటి ధ‌ర‌లు విప‌రీతంగా పెరిగిపోయాయి. దాంతో స‌మ‌స్య దారికొచ్చింది.

కుటుంబానికి కొనుక్కునే స‌రుకుల తోనే జంక్‌ఫుడ్‌ని కూడా కొనుగోలు చేసేవారు వాటిని కొన‌టం, తిన‌టం బాగా త‌గ్గించారు. ఉప్పు ఎక్కువ‌గా వాడిన స్నాక్స్‌, చిప్స్‌, పేస్ట్రీలు, శీత‌లీక‌రించిన డిజ‌ర్టులు త‌దిత‌ర ఆహారాల అమ్మ‌కాలు ప‌న్నులు విధించాక‌ 2014నుండి త‌గ్గుముఖం పట్టాయ‌ని ఒక అధ్య‌య‌నంలో తేలింది. అయితే ఉన్న‌త ఆదాయ సామాజిక వ‌ర్గాలు మాత్రం వీటిని తింటూనే ఉన్నార‌ని ఆ అధ్య‌య‌నం వెల్ల‌డించింది. దిగువ ఆదాయ వ‌ర్గాల వారు 10.2శాతం, మ‌ధ్య‌త‌ర‌గ‌తి వారు 5.8 శాతం వ‌ర‌కు వీటి వినియోగాన్ని త‌గ్గించేశారు. తీపి పానీయాల‌ను ఆరుశాతం వ‌ర‌కు త‌గ్గించారు.

2014లో టాక్స్ విధించిన ఆహారం కొనుగోళ్లు నెల‌కు మ‌నిషికి 25 గ్రాముల చొప్పున ప‌డిపోయాయి. దీన్ని కేల‌రీల్లో చెప్పాలంటే మ‌నిషికి నెల‌కు 70 నుండి 110 కిలోకేల‌రీల జంక్‌ఫుడ్‌ని త‌గ్గించి తింటున్నార‌ని అర్థం. ట్యాక్స్ విధించ‌ని ఆహార కొనుగోళ్ల‌లో ఎలాంటి మార్పు రాలేదు. ట్యాక్స్ విధించిన ప‌దార్థాల్లో ఎక్కువ‌గా కొనుగోళ్లు త‌గ్గిన‌వి ఉప్పు ఎక్కువ‌గా ఉన్న స్నాక్స్‌, చిరుధాన్యాల‌తో త‌యారైన స్వీట్లు. అయితే ఈ లెక్క‌ల‌న్నీ కుటుంబాలు త‌మ నెల‌వారీ స‌రుకుల‌తో పాటు కొనుగోలు చేస్తున్న శ‌క్తిమాత్ర‌మే ఇచ్చే ఫుడ్ గురించి. బ‌య‌ట షాపులు, హోట‌ళ్లు లాంటి చోట్ల త‌గ్గిన అమ్మకాల‌ను బ‌ట్టి చూస్తే వీటి వినియోగం ఇంకా బాగా త‌గ్గి ఉంటుంద‌ని భావించాల‌ని అధ్య‌య‌న నిర్వాహ‌కులు వెల్ల‌డించారు.

టాక్స్ పెరుగుద‌ల వల‌న శ‌క్తిమాత్ర‌మే ఇచ్చే జంక్‌ఫుడ్ వినియోగం త‌గ్గ‌డ‌మే కాకుండా వీటి త‌యారీ దారులు టాక్స్‌ని త‌ప్పించుకోవ‌డానికి వాటిలో ఉన్న కేల‌రీల‌ను త‌గ్గించి ఉత్ప‌త్తి చేస్తున్నారు. ప‌న్నుల కార‌ణంగా ల‌భించిన మ‌రొక మంచి ఫ‌లితం ఇది. జ‌న‌వ‌రి 2012నుండి డిసెంబ‌రు 2014 వ‌ర‌కు 6,248 కుటుంబాల కొనుగోళ్ల‌ను ప‌రిశీలించి ఈ అధ్య‌య‌నం నిర్వ‌హించారు. దేశంలో ఒబెసిటీ స‌మ‌స్య శృతి మించ‌డంతో మెక్సికో ప్ర‌భుత్వం ఈ నిర్ణ‌యం తీసుకుంది. ఆ దేశంలో 2నుండి 18 సంవ‌త్స‌రాల మ‌ధ్య వ‌య‌సున్న పిల్ల‌ల్లో 33శాతం మంది స్థూల‌కాయంతో బాధ‌ప‌డుతున్నారు. అలాగే పెద్ద‌వాళ్ల‌లో 70 శాతం మంది ఒబెసిటీ ఉన్న‌వారే. ఎన‌ర్జీ నిచ్చే ఆహార ప‌దార్థాల‌ను ఎక్కువ‌గా వినియోగిస్తున్న దేశాల్లో ఇది నాల్గ‌వ స్థానంలో ఉంది.