కుటుంబ పరువుపోతుందని...ఆ పాక్ మోడల్ని చంపేశారు!
పాకిస్తాన్, పంజాబ్ రాష్ట్రంలోని ముల్తాన్ అనే సిటీలో ఒక మోడల్ని ఆమె సోదరుడే హత్య చేసినట్టుగా తెలుస్తోంది. 26 ఏళ్ల ఖండీల్ బాలోచ్ అనే ఆ యువతి నటి, మోడలే కాక, సోషల్మీడియా సెలబ్రిటీగా పేరు తెచ్చుకుంది. శుక్రవారం బాలోచ్ హత్యకు గురయిందని, ఆమెని గొంతు నులిమి హత్య చేశారని, దీన్నిపరువు హత్యగా భావిస్తున్నామని పోలీసులు శనివారం వెల్లడించారు. బాలోచ్ అసలు పేరు ఫౌజియా అజీమ్. మోడలింగ్ చేయవద్దని, సోషల్ మీడియాలో రెచ్చగొట్టే ధోరణిలో ఫొటోలను ఉంచవద్దని […]
పాకిస్తాన్, పంజాబ్ రాష్ట్రంలోని ముల్తాన్ అనే సిటీలో ఒక మోడల్ని ఆమె సోదరుడే హత్య చేసినట్టుగా తెలుస్తోంది. 26 ఏళ్ల ఖండీల్ బాలోచ్ అనే ఆ యువతి నటి, మోడలే కాక, సోషల్మీడియా సెలబ్రిటీగా పేరు తెచ్చుకుంది. శుక్రవారం బాలోచ్ హత్యకు గురయిందని, ఆమెని గొంతు నులిమి హత్య చేశారని, దీన్నిపరువు హత్యగా భావిస్తున్నామని పోలీసులు శనివారం వెల్లడించారు.
బాలోచ్ అసలు పేరు ఫౌజియా అజీమ్. మోడలింగ్ చేయవద్దని, సోషల్ మీడియాలో రెచ్చగొట్టే ధోరణిలో ఫొటోలను ఉంచవద్దని సొంత కుటుంబ సభ్యులు కొంతకాలంగా ఆమెను బెదిరిస్తున్నట్టుగా తెలుస్తోంది. బాలోచ్ సోదరుడు ఆమె పోస్ట్ చేస్తున్న వీడియోలు, ఫేస్ బుక్ పోస్టుల పట్ల తీవ్ర ఆగ్రహంతో ఉన్నాడని పోలీసులు తెలిపారు. ఈ నేపథ్యంలో కొన్ని వారాల క్రితం బాలోచ్ తనకు రక్షణ కావాలంటూ హోం మంత్రికి, ఫెడరల్ ఇన్వెస్టిగేషన్ అథారిటీ డైరక్టర్ జనరల్కి, ఇస్లామాబాద్ సీనియర్ సూపరింటెండెంట్కి లేఖలు రాసిందని డాన్ అనే పత్రిక తెలిపింది. తనకు ప్రాణభయం ఉందని, బెదిరింపు కాల్స్ వస్తున్నాయని ఆమె తెలిపినట్టుగా డాన్ పేర్కొంది.
బాలోచ్ తన వీడియోలు, పోస్ట్లు, సొంత పబ్లిసిటీ ద్వారా చాలా ధైర్యవంతురాలిగా పేరు తెచ్చుకుంది. ఆమెకు సోషల్ మీడియాలో వేలమంది ఫాలోవర్స్ ఉన్నారు. బాలోచ్ చాలాసార్లు తనకు పాక్ మాజీ క్రికెటర్, ప్రస్తుతం రాజకీయాల్లో ఉన్న ఇమ్రాన్ ఖాన్ని వివాహం చేసుకోవాలని ఉందని చెప్పింది. ఆమెతో సెల్ఫీ దిగినందుకు, చంద్రుడు కనిపించే సమాచారాన్ని అందించే మతపరమైన సంస్థలో సభ్యుడిగా ఉన్న ముఫ్తీ ఖవీని మతవ్యవహారాల మంత్రిత్వ శాఖ కిందటి నెలలో సస్పెండ్ చేసింది. పాక్లో పరువు హత్యలు ఎక్కువగా జరుగుతున్నాయి. గత ఏడాది 1,096 మంది మహిళలు, 88 మంది మగవారు పరువుహత్యలకు బలైపోయారు. అక్కడ చాలావరకు పరువు హత్యలు చేసిన వారికి శిక్షలు పడవు. ఇస్లామిక్ షరియా చట్టం ప్రకారం, కుటుంబ సభ్యురాలిని లేదా సభ్యుడిని పోగొట్టుకున్న కుటుంబానికి హంతకుడిని క్షమించే వీలుంది. అదీకాక చాలాసందర్భాల్లో ఈ హంతకుడు కుటుంబ సభ్యుడే అయివుండే అవకాశం ఉంది. అలాగే తమకు కావాల్సిన మనిషిని జైలుకి పంపడం ఇష్టంలేక బంధువులు సైతం మౌనంగా ఉంటారు.