స్పూను గాడిద పాలు...యాభై రూపాయ‌లు!

బెంగ‌లూరులో గాడిద పాల వ్యాపారం జోరుగా సాగుతోంది. పిల్ల‌ల‌కు గాడిద‌పాలు మేలు చేస్తాయ‌నే న‌మ్మ‌కం ఇప్ప‌టికీ గ్రామాల్లో ఉంది. అయితే గ్రామాల్లోనే కాదు…ఇప్పుడు బెంగ‌లూరులో ప‌సిపిల్ల‌ల త‌ల్లిదండ్రులు గాడిద‌పాలు దొరికితే చాలు…ఎంత ధ‌ర ఇచ్చి అయినా కొనేందుకు సిద్ధంగా ఉంటున్నారు. ఒక్క స్పూను పాల‌కు యాభైరూపాయ‌ల వ‌ర‌కు చెల్లిస్తున్నారు. కోలార్ న‌గ‌రానికి చెందిన కృష్ణప్ప అనే వ్య‌క్తి…గాడిద‌పాల‌ను అమ్మ‌డం కోసం బెంగ‌లూరులోనే ఎక్కువ రోజులు ఉంటున్నాడు. అత‌ని ద‌గ్గ‌ర ల‌క్ష్మి అనే గాడిద ఉంది. అది అత‌నికి నిజంగానే ల‌క్ష్మీక‌టాక్షాన్ని క‌లిగిస్తోంది. కృష్ణ‌ప్ప లక్ష్మిని, దాని పిల్ల‌ని వెంట‌బెట్టుకుని క‌న్న‌డంలో…గాడిద‌పాలో అని అరుస్తూ వీధుల్లో తిరుగుతుంటాడు. అంతేకాదు…ఆస్త‌మా, జ‌లుబు, ద‌గ్గులను త‌గ్గించ‌డంలో బాగా ప‌నిచేస్తాయ‌ని కూడా చెబుతుంటాడు.

గాడిద‌పాలు పిల్ల‌ల‌కు మంచివని పెద్ద‌వాళ్లు చెబుతుంటార‌ని, ఎన్నో పుస్త‌కాల్లో కూడా రాశార‌ని…మ‌రి అవి అందుబాటులోకి వ‌చ్చిన‌పుడు ఎందుకు వ‌దిలిపెడ‌తామ‌ని ల‌క్ష్మి…పాల‌ను కొంటున్న బెంగలూరు వాసులు చెబుతున్నారు. అగ్రిక‌ల్చ‌ర‌ల్ సైన్సెస్ యూనివ‌ర్శిటీలో డైరీ సైన్సెస్‌లో ప్ర‌త్యేక అధికారిగా ప‌నిచేస్తున్న జ‌య‌ప్ర‌కాష్ సైతం ఇందులో నిజం ఉంద‌ని అంటున్నారు. గాడిద పాల‌ల్లో బ్యాక్టీరియాకు వ్య‌తిరేకంగా పోరాడే ల‌క్ష‌ణాలు ఉన్నాయ‌ని, ఇవి రోగ‌నిరోధ‌క శ‌క్తిని పెంచుతాయ‌ని ఆయ‌న తెలిపారు. గ్రామాల్లో త‌ల్లి పాల‌కు ప్ర‌త్యామ్నాయంగా వీటిని వాడేవార‌ని, పిల్ల‌ల‌కు ఒక్క‌ స్పూన‌యినా గాడిద‌పాలు తాగించాల‌నే ఆచారం ఉంద‌ని, త‌ల్లి పాలు ఇవ్వ‌లేని స్థితిలో ఉంటే, గాడిద‌పాల‌ను పిల్ల‌ల‌కు ప‌ట్ట‌వ‌చ్చ‌ని ఆయ‌న అంటున్నారు. అయితే గాడిద‌పాలు చాలా కొద్దిమొత్తంలో మాత్ర‌మే ల‌భించ‌డం వ‌ల‌న వీటిని వ్యాపార‌దృష్టితో చూడ‌లేమ‌ని ఆయ‌న చెప్పారు. ఇదిలా ఉంటే గాడిద‌పాలలో పోష‌కాలు ఉన్న‌ట్టుగా పోష‌కాహార సైన్స్‌లో లేద‌ని ఈ రంగానికి చెందిన ఓ నిపుణురాలు వెల్ల‌డించారు.