'గ్లాస్‌మేట్స్' సాంగ్ లాంఛ్ చేయనున్న మెగా మేనల్లుడు

వరుసగా ఆరు డిజాస్టర్లను అందుకున్న మెగా మేనల్లుడు సాయి ధరమ్ తేజ్ ఇప్పుడు తన ఆశలన్నీ తన తదుపరి చిత్రం ‘చిత్రలహరి’ పైనే పెట్టుకున్న సంగతి తెలిసిందే. కిషోర్ తిరుమల దర్శకత్వం వహించిన ఈ చిత్రం ఏప్రిల్ 12న విడుదల కానుంది. నివేదా పేతురాజ్, కళ్యాణి ప్రియదర్శన్ ఈ సినిమాలో హీరోయిన్లుగా నటించారు.

ఈ మధ్యనే విడుదలైన ఈ చిత్ర టీజర్2కు ప్రేక్షకుల నుంచి చాలా మంచి రెస్పాన్స్ అందింది. టీజర్ చాలా ఆకట్టుకునే విధంగా ఉందని సినిమా కూడా కచ్చితంగా హిట్ అవుతుందని మెగా అభిమానులు కూడా ఆశపడుతున్నారు. అంతేకాక ఇప్పటికే ఈ సినిమా నుంచి విడుదలైన ‘పరుగు పరుగు’ అనే పాటకు మంచి ఆదరణ లభించింది.

ఈ నేపథ్యంలో సినిమాలోని రెండవ పాటను విడుదల చేయడానికి చిత్ర బృందం సన్నాహాలు చేస్తోంది. తాజా సమాచారం ప్రకారం చిత్రలహరిలోని ‘గ్లాస్‌మేట్స్’ అనే పాటను త్వరలో లాంచ్ చేయనున్నారని తెలుస్తోంది. ఖమ్మంలోని సీక్వెల్ రిసార్ట్స్‌లో మార్చి 24వ తారీఖున సాయంత్రం ఏడు గంటలకు ఈ సాంగ్ లాంచ్ ఈవెంట్ జరుగనుంది.

టీజర్ చాలా బాగుండటంతో సినిమాపై మంచి అంచనాలు ఏర్పడ్డాయి. మైత్రి మూవీ మేకర్స్ ఈచిత్రాన్ని నిర్మిస్తున్నారు. దేవిశ్రీ ప్రసాద్ ఈ సినిమాకు సంగీతాన్ని అందిస్తున్నారు.