సబ్జాగింజలు.... తక్కువ ఖర్చు.... ఎక్కువ ఆరోగ్యం....

పిట్ట కొంచెం… కూత ఘనం.. సబ్జాగింజలు కూడా అంతే… చూడడానికి చిన్నవిగా ఉన్నా వాటి వల్ల కలిగే ప్రయోజనాలు మాత్రం చాలా.. ఈ మొక్క తులసి జాతికి చెందింది. అందుకే తులసి విత్తనాలు… సబ్జా గింజలు కూడా ఒకేలా ఉంటాయి. వీటిని ఇంగ్లీష్ లో బాసిల్ సీడ్స్ (basil seeds) అంటారు. ఇవి చూడడానికి ఆవాల్లా ఉంటాయి… నీళ్లలో వేస్తే సగ్గుబియ్యంలా మారతాయి….

• సబ్జా గింజల ప్రధాన గుణం వేడిని తగ్గించడం. అందుకే వీటిని వేసవి కాలంలో విరివిగా వాడతారు.
• ఈ గింజల్లో ఫైబర్ శాతం ఎక్కువగా ఉండడంతో సుఖ విరోచనం అవుతుంది. అంతే కాదు మలబద్దకాన్ని నివారిస్తుంది.
• సాధారణంగా ఈ గింజలను ఫాలుడా… ఐస్ క్రీమ్స్…. ఇతర పానీయాలలో కలుపుకుని తాగుతారు.
• వేసవి కాలంలో శరీరాన్ని చల్ల పరచడమే కాదు… ఈ కాలంలో వచ్చే సమస్యలను అడ్డుకుంటాయి ఈ సబ్జా గింజలు.
• అజీర్ణంతో బాధపడే వారు ఈ గింజలను నాన పెట్టి నిమ్మరసంతో కలిపి తాగితే ఆహారం వెంటనే జీర్ణం అవుతుంది.
• ద్రాక్ష, ఆరెంజ్, పైనాపిల్ వంటి జ్యూస్ లలో సబ్జా గింజలు కలుపుకుని తాగితే వాటిలోని గుణాలు కూడా శరీరానికి ఎంతో మేలు చేస్తాయి.
• రాత్రి పడుకునే ముందు నాన పెట్టిన సబ్జాగింజలు తాగితే మంచి ఫలితం ఉంటుంది.
• వీటిలో ఉన్న ఫోలిక్ యాసిడ్ మహిళలలో రుతు క్రమాన్ని సరిజేస్తుంది.
• శరీరంపై గాయలకు సబ్జాగింజల పేస్ట్ కు కొద్దిగా కొబ్బరి నూనెతో కలిపి రాసుకుంటే ఆ గాయాలు త్వరగా మానిపోతాయి.
• ఈ గింజలు తాగడం వల్ల మనసుకు ఎంతో ప్రశాంతత చేకూరుతుంది. అంతే కాదు శరీరానికి నూతన ఉత్సాహం… ఉల్లాసం కలుగుతుంది.
• క్రీడాకారులు ఆటల సమయంలో ఎంతో అలసి పోతారు. వీరి శరీరం నుంచి నీరు చెమట రూపంలో బయటకు పోతుంది.. అలాంటప్పుడు సబ్జాగింజల నీరు తాగితే శరీరానికి నూతన ఉత్తేజం వస్తుంది.
• రక్తహీనతతో బాధపడేవారు తరచూ ఒక కప్పు సబ్జాగింజలు తీసుకుంటే కొత్త రక్తం పడి మంచి ఆరోగ్యంగా తయారవుతారు.
• ఇందులో ఉన్న పోషకాలు, విటమిన్లు, ఐరెన్… ఇతర ఖనిజాలు వ్యాధి నిరోధక శక్తిని పెంచడమే కాకుండా అనేక రోగాలను నివారిస్తాయి.
• ఎసిడిటీ… కడుపులో మంటతో బాధపడుతున్నవారు కొంచెం సబ్జాగింజలను నాన పెట్టుకుని అందులో కొద్దిగా పంచదార కలుపుకుని తాగితే కడుపులో మంట, ఎసిడిటీ వెంటనే మాయం అవుతుంది.
• చేపలలో ఏ ఔషధ గుణాలైతే ఉన్నయో అవన్నీ కూడా సబ్జాగింజలలో ఉన్నాయంటే అతిశయోక్తి కాదు.
• సబ్జాలు ఒక యాంటీ బయోటిక్ మెడిసిన్ లా పనిచేస్తాయి. శరీరంలో ఉన్న చెడు బ్యాక్టీరియాను తొలగిస్తాయి.
• శ్వాస సంబంధిత సమస్యలతో బాధపడేవారు సబ్జాగింజలు కొద్దిగా అల్లం రసం, తేనేతో కలిపి తీసుకోవాలి. ఇవి రక్తాన్ని శుద్ది చేసి, చెడు కొలెస్ట్ర్రాల్ ను అదుపు చేస్తుంది.
• ఇందులో క్యాలరీలు అతి తక్కువగా ఉంటాయి కాబట్టి ఎంత తిన్నాకూడా ఎలాంటి ఇబ్బంది ఉండదని వైద్య నిపుణలు చెబుతున్నారు.
• కొంతమందికి అతిగా తినే అలవాటు ఉంటుంది. అలాంటి వారు నానపెట్టిన సబ్జాగింజలను తింటే అతిగా తినే అలవాటు క్రమేపీ తగ్గుతుందని నిపుణులు చెబుతున్నారు.