సాహో.. ఓవర్సీస్ రికార్డు జస్ట్ మిస్

మిలియన్ డాలర్ క్లబ్ అనేది టాలీవుడ్ సినిమాకు డ్రీమ్. అలాంటిది సింగిల్ డేలోనే 10లక్షల డాలర్ల వసూళ్లంటే మాటలు కాదు. అలాంటి అరుదైన ఘనతకు ఇప్పటికే కొందరు దక్కించుకున్నారు. కానీ సాహో సినిమా మాత్రం కొద్దిలో ఈ రికార్డును మిస్ అయింది. ఈరోజు రిలీజైన ఈ సినిమా మొదటి రోజు మిలియన్ మార్క్ క్రాస్ చేయలేకపోయింది.

సాహో సినిమాకు ప్రీమియర్స్ తో కలుపుకొని ఓవర్సీస్ లో 9 లక్షల 15వేల డాలర్లు వచ్చాయి. అమెరికా, కెనడాలోని 317 లొకేషన్స్ నుంచి వచ్చిన డేటా ఆధారంగా ఇంత మొత్తం కలెక్ట్ అయినట్టు ప్రకటించారు. మరో 32 లొకేషన్స్ నుంచి డేటా రావాల్సి ఉంది. ఆ వసూళ్లు కలుపుకున్నప్పటికీ ఇది 10 లక్షల డాలర్లు కలెక్ట్ చేయడం కష్టం. అలా మొదటి రోజు మిలియన్ డాలర్ క్లబ్ లోకి వెళ్లలేకపోయింది సాహో.

ఓవర్సీస్ లో మొదటి రోజు వసూళ్లలో బాహుబలి-2దే రికార్డు. ఆ తర్వాత అజ్ఞాతవాసి, బాహుబలి-1, ఖైదీ నంబర్-150 సినిమాలున్నాయి. ఇవన్నీ మొదటి రోజే మిలియన్ మార్క్ గ్రాస్ అందుకున్నాయి. కానీ సాహో మాత్రం ఈ మార్క్ అందుకోలేకపోయింది.