హత్య మూవీ ట్రయిలర్ రివ్యూ

తమిళ హీరో విజయ్ ఆంటోనీ నటిస్తున్న కొత్త సినిమా 'హత్య'. ఇన్వెస్టిగేటివ్ థ్రిల్లర్ మూవీగా ఈ సినిమా రూపొందుతోంది. ఈ చిత్రంలో డిటెక్టివ్ పాత్రలో విజయ్ ఆంటోనీ కనిపించనున్నారు. హీరోయిన్ రితికా సింగ్ ఓ కీలక పాత్ర పోషిస్తోంది. లోటస్ పిక్చర్స్ తో కలిసి ఇన్ఫినిటీ ఫిలిం వెంచర్స్ సంస్థ నిర్మిస్తోంది.

తాజాగా ఈ చిత్ర ట్రైలర్ ను హీరో నాని సోషల్ మీడియా ద్వారా విడుదల చేయగా.. హైదరాబాద్ ప్రసాద్ ల్యాబ్స్ లో సందడిగా ప్రెస్ మీట్ నిర్వహించారు. ఈ కార్యక్రమంలో నిర్మాతలు బెల్లంకొండ సురేష్, జీవీజీ రాజు, నిశ్శబ్ధం చిత్ర దర్శకుడు హేమంత్ మధుకర్ తదితరులు అతిథులుగా పాల్గొన్నారు.

దాదాపు 2 నిమిషాల నిడివి ఉన్న ఈ ట్రయిలర్ ఆద్యంతం ఆసక్తికరంగా సాగింది. లైలా అనే ఔత్సాహిక మోడల్, కాబోయే హీరోయిన్ హత్యకు గురవుతుంది. ఆమె కేసును వారం రోజుల్లో కొలిక్కి తీసుకొచ్చే బాధ్యత డిటెక్టివ్ అయిన హీరోపై పడుతుంది. ఎలాంటి ఆధారా ల్లేని ఈ కేసును హీరో ఎలా చేధించాడనేది ఈ సినిమా స్టోరీ.

ట్రయిలర్ లో హీరో విజయ్ ఆంటోనీ, హీరోయిన్ రితిక సింగ్ తో పాటు.. కీలక పాత్రధారులైన రాధిక, మురళీశర్మ, మీనాక్షి చౌదరి లాంటి పాత్రలన్నింటినీ పరిచయం చేశారు. ట్రయిలర్ హాలీవుడ్ రేంజ్ లో రిచ్ గా ఉంది.

ఈ చిత్రానికి కమల్ బోరా, జి.ధనుంజయన్, ప్రదీప్ బి, పంకజ్ బోరా, విక్రమ్ కుమార్, తాన్ శ్రీ దొరైసింగమ్ పిల్లై, సిద్ధార్థ్ శంకర్,

ఆర్వీఎస్ అశోక్ కుమార్ నిర్మాతలు కాగా బాలాజీ కుమార్ దర్శకత్వం వహించారు. త్వరలోనే విడుదల తేదీని ప్రకటించనున్నారు.