హిందుత్వ‌పై శ‌శిథ‌రూర్ సంచ‌ల‌న వ్యాఖ్య‌లు
ప్ర‌స్తుతం హిందుత్వం అని చెప్పేది హిందుత్వ కాదు అన్నారు కాంగ్రెస్ నేత శశి థరూర్. హిందుత్వం... వేదాలు, ఉపనిషత్తుల మహిమను,గొప్ప‌ద‌నాన్ని తగ్గిస్తుంది. హిందుత్వ అనేది బ్రిటిష్ ఫుట్‌బాల్ లీగ్ యొక్క గూండాయిజం లాంటిది త‌ప్ప మరొకటి కాదు" అన్నారు.
పార్లమెంటు సభ్యుడు శశి థరూర్ హిందుత్వను బ్రిటిష్ ఫుట్‌బాల్ బృందంలోని పోకిరితనంతో పోల్చారు. ఇది హిందూ మతం గౌర‌వాన్ని, వేదాలు, ఉపనిషత్తుల సందేశాన్ని చిన్న‌బుచ్చుతుంద‌ని అన్నారు. అంగీకరించిన దానిని నమ్మడం హిందువుల ప్రాథమికమ ధర్మమని థరూర్ అన్నారు. కాంగ్రెస్ అధ్యక్ష పదవికి ప్రచారం చేసేందుకు ఆయన ముంబై కి వెళ్ళారు.
బాంద్రాలోని ఇండస్డా ఫౌండేషన్‌తో కలిసి సెయింట్ పాల్స్ మీడియా అండ్ కమ్యూనికేషన్ సెంటర్ ఫాద‌ర్ స్టాన్ స్వామి స్మారక స‌భ నిర్వహించింది. ఈ స‌భ‌లో 'మానవ హక్కులు సార్వత్రికమా?' అనే అంశంపై థరూర్ స్మారక ఉపన్యాసం చేశారు. థరూర్ మాట్లాడుతూ, "నేను హిందూ మతంపై ఒక పుస్తకాన్ని రాసాను. నేను హిందూ అని చెప్పుకోడానికి గర్విస్తున్నాను. అయితే ప్ర‌స్తుతం హిందుత్వం అని చెప్పేది హిందుత్వ కాదు.. కాబోదు. ఆ సిద్ధాంతాల పై నమ్మకమే హిందువులకు ప్రాథమికమైనది. హిందుత్వం, వేదాలు, ఉపనిషత్తుల మహిమను,గొప్ప‌ద‌నాన్ని తగ్గిస్తుంది. హిందుత్వ అనేది బ్రిటిష్ ఫుట్‌బాల్ లీగ్ యొక్క గూండాయిజం లాంటిది త‌ప్ప మరొకటి కాదు" అన్నారు.
సంస్కృతి, స‌మూహాల హక్కులు, వ్యక్తిగత హక్కులు, మతాలు, మానవ హక్కుల మధ్య సంబంధాలతో వ్యవహరించే వివిధ తత్వాల గురించి విభిన్న ప్రపంచంలో సార్వత్రిక మానవ హక్కులు ఉన్నాయా అనే అంశంపై మాట్లాడారు. తరచుగా సంస్కృతి (సాంస్కృతిక హక్కులు) మానవ హ‌క్కుల‌కు విరుద్ధంగా ఉంటాయని అన్నారు. "కానీ ఏ సంస్కృతిలోనూ పవిత్రమైనది ఏమీ లేదు," అని థరూర్ అన్నారు. హిందూ మతం సతి, అంటరానితనం వంటి ఆచారాలను తిరస్కరించింది. "బలవంతం చేయ‌డం, ఒప్పించ‌డం అనేది మానవ హక్కుల సంస్కృతి కాదు, పరీక్ష...." అని అన్నారు. "సార్వత్రికత అంటే ఏకరూపత కాదు. " అన్నారు. మహిళా రిజర్వేషన్ బిల్లు, ఫిరాయింపుల నిరోధక చట్టాన్ని తాజాగా తమ పార్టీ తీసుకువస్తుందని చెప్పారు.
ఫాద‌ర్ స్టాన్ స్వామి గురించి, థరూర్ మాట్లాడుతూ, "ఆదివాసీలు, ఆదివాసీల హక్కుల కోసం పోరాడుతున్నప్పుడు అతని మానవ హక్కులు ఉల్లంఘించ‌బ‌డ్డాయి. మేము సంపన్నుల సార్వత్రిక మానవ హక్కుల నుంచి అత్యంత నిరుపేదలను, వారి హ‌క్కుల‌ను మినహాయించలేము." అన్నారు.
స‌మాజానికి ఎంతో సేవ చేసిన‌ప్పటికీ స్టాన్ స్వామి దోషిగా నిర్ధార‌ణ కాకుండానే పోలీసు కస్టడీలో మరణించాడని అన్నారు. అతని మరణానికి వ్యవస్థే కారణమని వ్యాఖ్యానించారు.
స్టాన్‌కు వ్యక్తిగతంగా తెలిసిన ఫాద‌ర్ ఫ్రేజర్ మాట్లాడుతూ స్టాన్ లాంటి సంఘ‌సేవ‌కుడు, మాన‌వ‌తా వాది హింసను సమర్థిస్తాడనడం నమ్మశక్యం కాదని అన్నారు. "స్టాన్ స్వామి ఎప్పుడూ హింసను సమర్ధించలేద‌ని మాకు తెలుసు. జైలులో అతని పట్ల దారుణంగా ప్రవర్తించారు. అతని మరణానికి కారణాన్ని ద‌ర్యాప్తు చేయాల‌ని మేము కోర్టులో పోరాడుతున్నాము. " అని అతను చెప్పాడు.
