'దేవర' ప్లేస్ లో దేవరకొండ.. ఫ్యామిలీ స్టార్ రిలీజ్ డేట్ ఫిక్స్

జూనియర్ ఎన్టీఆర్ హీరోగా కొరటాల శివ దర్శకత్వంలో చేస్తున్న దేవర సినిమా రిలీజ్ డేట్ వాయిదా పడింది. ఆ మూవీ స్థానంలో ఏప్రిల్ 5న రౌడీబాయ్ విజయ్ దేవరకొండ నటిస్తున్న `ఫ్యామిలీ స్టార్` విడుదల కానుంది. ఈ మేరకు మేకర్స్ అఫీషియల్ గా ప్రకటించారు. ఫ్యామిలీ స్టార్ మూవీకి పరశురామ్ దర్శకత్వం వహిస్తుండగా.. మృణాల్ ఠాకూర్ హీరోయిన్ గా నటిస్తోంది.

ఈ సినిమా మొదట సంక్రాంతికి రిలీజ్ చేయాలని నిర్మాత దిల్ రాజు భావించారు. అయితే కొన్ని కారణాల వల్ల ఈ సినిమా వాయిదా పడింది. ఇప్పుడు ఈ సినిమాను ఏప్రిల్ 5న విడుదల చేయనున్నట్లు దిల్ రాజు ప్రకటించారు. ఈ మేరకు ప్రత్యేకంగా ఓ పోస్టర్ రిలీజ్ చేశారు.

మూవీ టీమ్ రిలీజ్ చేసిన పోస్టర్ ద్వారా ఫ్యామిలీ స్టార్ మూవీలో రెండు మార్పులు చేసినట్లు తెలుస్తోంది. సినిమా టైటిల్ ని ఫ్యామిలీ స్టార్ కు బదులుగా 'ది ఫ్యామిలీ స్టార్ ' గా మార్చారు. ఈ సినిమాను మొదట తెలుగులో మాత్రమే రిలీజ్ చేస్తామని నిర్మాత ప్రకటించగా.. ఇప్పుడు తమిళ్‌లో కూడా ఏకకాలంలో విడుదల చేయనున్నట్లు పోస్టర్ ద్వారా ప్రకటించారు.

ఎన్టీఆర్ హీరోగా నటిస్తున్న దేవర సినిమా రిలీజ్ డేట్ ఏప్రిల్ 5గా ముందే నిర్ణయించారు. అయితే ఈ సినిమాలో విలన్ గా నటిస్తున్న సైఫ్ అలీఖాన్ ఇటీవల గాయపడి సర్జరీ చేయించుకున్నారు. దీంతో దేవర మూవీ షూటింగ్ కి బ్రేక్ పడింది. ఈ నేపథ్యంలో దేవర నిర్మాతలు తమ సినిమాను వాయిదా వేసుకున్నట్లు తెలుస్తోంది. ఆ ప్లేస్ లో ఇప్పుడు ఫ్యామిలీ స్టార్ విడుదల చేస్తున్నారు.